[color=red]منير.. من مرحلة لأخرى ( من غربة لحزن.. لمعافرة لحلم [/color]

[السلام عليكم

منير ممكن نقسم مشاريعه الأساسية ( بخلاف حب الوطن ) أو أفكار ألبوماته أو خطوطه العريضة
بمعنى أصح فى منطقة يهمنى الإنسان و لو مالوش عنوان
إلى خمس خطوط عريضة

1- غربة
2- هموم الوطن و التحريض على الكلام و البوح و توعية الناس ( عامةً ) بقضاياهم و الخطر اللاحق و الطوفان
3-التحريض على الحلم
4- التمسك بالحلم و عدم اليأس ,, فحال الدنيا متقلب
5- أخيراً ما هو طعم البيوت


أنا هاشرح ال5 مراحل دى خلال أليومات منير مجمعة ,. يعنى مش لازم كل ألبوم لوحده

أهم حاجه بقى الصبر فى القراءة لأنه موضوع كبير شوية كده لأنه شارح كتير و لامم كتير

*************
( 1 ) الغربة
بداية منير أول أليوم كانت مجموعة علمونى عينيكى اللى بسببها منير أجل أغنية القدس رغم وجودها معاه من البداية .....

حط قدامه قضية الغربة و قرب من جمهوره بمفتاح الغربة . بغض النظر بقى عن شكل الموسيقى أو شكل منير نفسه كاول ظهور له .


**************************************** ****

(2) هموم الوطن

بعد كده منير انتقل لمرحلة التعريف بنفسه و مواضيعه فى ألبوم بنتولد

و بعد كده كان مشروع منير التانى أو الفكر اللى سيطر عليه فترة فى أغانيه زى المدينة ..

و مجموعو ألبوم اتكلمى .. و القدس ,, و الناس نامت و أتحدى لياليك .. و العمارة و شمس المغيب

إلى قلب الوطن مجروح لا يحتمل أكتر ... كان تركيز منير الأساسى و الفكر المسيطر عليه بغض النظر عن أغانى المقسوم و الطول واللون و الرومانسى,,,

كان مهموم كتير بالبلد و بالعرب و عمال يحرض على عدم السكوت , و على عدم النوم

و أنا قد الهوى و قدود ... و أتحدى لياليك يا غروب ,, وقضية فلسطين و الفتن الداخلية و حزنه على جرح الوطن لشبابه

و ساح يا بداح يا سؤال جراح ....حتى بوسترات منير كانت كلها عبارة عن منير و ابتسامه المشهورة و خلفية بسيطة

و نلاجظ أغانى الغربة قلت تدريجياً ,,, و مفيش أغانى تحريض على الحلم أبداً فى الفترة دى تماماً أو تجديد الأمل بشكل مباشر باستثناء أغنية هييه تقريباً .


**************************************** ******

(3) التحريض على الحلم

بعد كده سيطر على منير ... أو منير دخل فى منطقة أخرى تماماً

و كانت فى نفس أليوم افتح قلبك اللى كان يعتبر نهاية فترة منير للتحريض على الثورة

و على عدم السكوت و على التنبيه و العمل على اندار الناس بالقضية و حجمها ..

لأنه تقريباً أغانيه فى الفترة دى شملت كل القضايا العربية و المصرية و العالمية فى افتح قلبك أيضاً

و بدأ منير بملحمة لو بطلنا نحلم نموت

و دخل معانا فى مرحلة التحريض على الحلم و على الكفاح و بدأ تحس أنه كلامه موجه مباشرة إلى كل فرد لوحده

مش بلغة الجماعة للتحريض على قضية قومية أو كده .. لأ ده بدأ يخصص الكلام أكتر


لو بطلنا نحلم نموت ... لو عاندنا نقدر نفوت
لو عدينا مرة خلاص... لو ردينا ضاع الخلاص
حبة صبر حبة حماس .. يبقى الحلم صورة و صوت
لو بطلنا نحلم نموت
مرة فى مرة حاول كتير .. أى مغامرة راح تنفعك


طبعاً تحريض مباشر .. كلام يستفزك للتمسك بحلمك و المعافرة و المغامرة ...

مش بيصبرك زى ما هيحصل بعد كده فى بحر الحياه ... و سر الحياه و ربك لما يريد .... لأ ده بيحرضك مباشرة ..

بيقولك قوم ماتفضلش مكانك ,, قوم وفوت و عافر وحماسك هيوصلك

و بعد كده كمل التحريض بس بصورة أعمق .. و بأسلوب مختلف تماماً و قال

أسكن بيوت الفرح......ممكن !
أسكن بيوت الجرح ...لا يمكن !!!
و مستحيل يا حزن راح تسكن !!
قدر الزمان يفهمنا ( و يحقق أحلامنا ) ... أه يمكن

طبعاً الأسلوب اتغير بس نفس الفكرة و نفس التحريض اللى منير عايزه

و فى مجموعة من أول لمسة تعتبر زى افتح قلبك لأنه مزج بين مرحلتين برضه ..

لأن التحريض تقريباً انتهى فى ألبوم من أول لمسة ما عدا أغنية واحدة فى ألبوم مساكن و هى ( اخرج من البيبان )

و فى أهم أغانى منير التحريضية اللى توقيتها تصادف مع من أول لمسة .. الأغنية اللى ماينفعش أى مطرب يغنيها... غيره منير ...

رغم ان كلامها بسيط و سهل و مش معقد ... بس لما شفت فى الحفلة تامر بيقولها و مى كساب , رغم ثقتى من قبل بضعفهم

بس ما توقعتش ان الأغنية دى ما تنفعش غير لمنير للدرجة دى !!!!!

طبعاً الأغنية هى


على صوتك بالغنا

على صوتك بالغنا.... لسه الأغانى ممكنة

ولو فى يوم راح تنكسر .... لازم تقوم واقف كما .. النخل باصص فى السما

دى غنوتك وسط الجموع .. تهز قلب الليل فرح ,, تداوى جرح اللى انجرح

ترقص؟؟

أرقص غصب عنى أرقص..

ينشبك ... حلمك فى حلمى
غصب عنى ارقص
ولا انهزام
ولا انكسار
ولا خوف
ولا حلم نابت فى الخلا

ايييه الكلام ده ؟

ايه التحريض ده ؟

بيكلمنى و يكلمك و بعدها يكلمنا كلنا سوا و يشبك حلمى بحلمك !!!

ده تحريض ولا كأنه مدروس بالتوقيت ده .. و بالكلام العبقرى اللى ما يعرفش يغنيه حد زى منير

بالذات لما يقول و لو فى يوم راح تنكسر .. لازم تقوم .. لازم بيقولها بأسلوب عبقرى ,,و مش بزهق منها والله فى الحفلات

و ممكن أبالغ و أقول ما تبطلش الأغنية دى يا منير لأن مفيش أقوى منها كمعانى و كأحساس بجد والله

نرجع تانى بقى للألبوم من أول لمسة

بعد كده وصلنا لمنطقة تانية و هى احلم بالمنطق و قبل ما تحلم فوق و توعية ,,,

خلاص التحريض وقف عند نقطة معينة ... بعد التحريض و الاستفزاز و الحماس... تــوعـيــة عشان الأمور تكون مظبوطة

قبل ما تحلم فوق ... احلم و انت فايق
قبل ما تطلع فوق... انزل للحقايق !!!!!

يا خبر !!!!!!! ده كأن منير ماشى معانا خطوة بخطوة

قالك احلم و قوم و عافر و هتوصل ,, وصلك لمرحلة معينة ... بعدها بقى قالك قبل ما تحلم فوق... و انزل للحقائق ..

و جايز حلم فى غمضة عين عايز يتحقق فى سنين .. و جايز يبقى الحلم اتنين و تحققهم قبل دقائق ...

كأن منير بيقولك هنا دلوقتى خلى حماسك ده حماس واااااااعى

و بعد كده قال..

الحزن قام حفر عفر ,, عفر قسى و دموع
قام الفرح غنا و صفر .. قال البكا ممنوع


استكمال لنفس الفكرة فى الكوبليه ده بس بفكر شاعر تانى .. عفر تراب همومك من عليك و ابدأ ..


عدى الألم فوتى ... فوتى الزمن بيمر ...
ازاى نسيب حزننا يرمى العسل على المر ..؟؟
فين قلبك الشاطر محتاج يكون صفى ؟

كده الحلم بقى معمم أكتر بقى للبلد ,, الشعب و البلد سوا فى مركب واحده

و توحد عندهم الإحساس بالحلم و نسيان الألم و نسيان المرار .. و بداية الإنطلاق


و بعد البلد والناس جالها الحماس الواعى و بداية الحلم .... ايه هو اول حلم قومى واحد

من أول لمسة .... غير لى سنينى

ألأ يستحق التصفيق ,,, و الأحترام أكثر و أكثر .؟؟!!

. ازاى عمل جرعة النصائح التقيلة دى و الارشادات و الخطوات دى فى شكل أغانى و موسيقى تسمعها بصوته و احساسه تدخل قلبك دون أى استئذان .. دون أن تشعر بأن حد بينصحك ..

لأن الأغانى دى تسمعها .. رد فعلك وقتها بيبقى انك تقوم و تتحرض و تبدأ

مش هتقدر تقول حاضر بعدين ... الموسيقى فى الأغانى دى تحريضية ,, فهى مختلفة .. لها صولوهات معبرة ,, كورال محفز ..

مش بيغنى ورا المطرب و خلاص .. كله مدروس عشان يخترقك لقلبك عن طريق أذتك

هذه تكفى فقط جملة من أول لمسة فى نظرى هى و على صوتك سوا ... خلص الكلام كده عن التحريض المباشر



**************************************** ********** ******

(4) التمسك بالحلم وعدم اليأس

بعدها سر الحياه ... و الفرحة و بحر الحياه و الدنيا لسه بخير و ريك لما يريد أحلامنا هتتحقق

مرحلة " التمسك بالحلم .. و عدم اليأس حتى لو حلم لم يحقق"

بدأها ب

مش كل شئ بيفوت فى عمرنا بيجرح......قلب الحياه مليان حاجات و بتفرح

فساتين السما ألوان بتطفى و تنور ,,, و أنا وانتى كلمة حب جوانا بتغير ..اه

و بعده عمل أسم الأليوم اللى بعده الفرحة

و الدنيا لو جارحة ... لونها لون فرحة
و عيش وقتك عيش أيامك .. الدنيا براح قدامك
والضحكة تهون أى جراح
على ايه تنزل دمعاتك .. لو يوم عداك أو فاتك

احلم بالجاى ... تعيش مرتااااح


يعنى حلمت و قمت و حاولت ووقعت تانى و حاسس انك كنت فى وهم أو ان الدنيا انتهت

ده الضحكة تهون أى جراح ..

احلم بس انت ببكرة ,, و مالكش دعوة و سيبها على الله و هتتظبط و تعيش مرتاح ان شاء الله ..

لخص الجمل دى فى كلام و لحن و مزيكا و صوت و أاء معبر جداً

و فى نفس مجموعة الفرحة ..... منير ساب الحلم ... و شاورلك على حاجه تانية ...

الفرصة بنت جميلة رتكبة عجلة ببدال
و العاقل لو يلحقها .. يتبدل بيه الحال

طب ناقص ايه تانى .. .؟؟!! مفيش تانى بجد ... حتى الفرصة شاورلك عليها بأغنية و لم ينساها ,,

و حاجه من عالم الواقع و من غير معافرة و من غير صبر ,,, محتاجه انك تلحقها بسسسس و حالك يتبدل ,

لأنك مدام لحقتها .. تبقى تستحقها بلا نقاش !!!

و بعد كده منير كمل و قال

ربك لما يريد .. أحلامنا هتحقق

و

حاول تتغير ... و مسيرك تقدر

وبلاش تستسلم يوم للحزن مدام عايشين

والدنيا لسه بخير .. بكره حييجى أكيد


***********************
(5) ما هو طعم البيوت

و أخيراً

بننجرح .. كل يوم لكن بيفرحنا... انت انت حوه القلب ساكن فى أقراحنا
و انت الأمل فى العيون والنشوة ساعة الجنون
و اياك تكون زيهم و تروح و تجرجنا
ده انت الــــــــــوحــــــــــــــــــــــــيـ ــــــــــ ـــــد منهم ..
تقدر تريحنا


فعلاُ منير هو الوحيد فى هذه الموسيقى اللى يقدر يريحنا


أعتقد انك دخلت مرحلة طعم البيوت... لعرض خلاصة أغانيك و أحلامك فى المجموعة دى

طعم أغانيك فى كل بيت مصرى عامل ازاى لأنك الوحيد المستقر داخل كل البيوت لأنك تحرض و لا تدخل من باب التسلبة فقط أو بيع الأحلام ...

إنما التحريض على الأحلام و على الحياه و التوعية و جالياً المشاركة لأهل البيوت بطعم البيوت

هل لسه فيه افكار بعد طعم البيوت ؟؟؟

ممكن سؤال منير فى اخر الألبوم يفتح سكه جديده

الله اعلم

بس عموماً
....



و منير لسه شايف الدنيا و بيوتنا كلها شبابيك



أسف أن الموضوع طويل , و باشكر كل اللى قدروا يكملوا قراءة للنهاية

و أتمنى أكون وضحت الصورة بتفصيل أكتر و فى نفس الوقت تكون كل الصور فى موضوع واحد

و هى مراحل أفكار منير الأساسية أو الخطوط العريضة فى تاريخ ألبوماته اللى بتبقى واضحة

أتمنى الموضوع يكون جميل و مفيد رغم طوله r=red][/color]