عاشق مصر
المدير العام
عدد الرسائل : 823
العمر : 72
الوظيفه : 
المزاج : 
نشاط العضو :
رسائل قصيره : أهلا وسهلا بكم فى منتدانا الوليد شاركونا النجاح
نقاط التميز : 647
السٌّمعَة : 2
نقاط : 50
تاريخ التسجيل : 12/08/2008
 |  موضوع: سمعت آخر نكت الحريق؟‮!‬  الخميس سبتمبر 11, 2008 6:06 am | |
| سمعت آخر نكت الحريق؟!
عادتهم ولا هايشتروها!!
زي عادة المصريين دايما لما تقع مصيبة أو تحل كارثة تشتغل الحتة الخفيفة اللي في الجينات المصرية وينزلوا تنكيت، الصغير قبل الكبير، وتسمع لك كم نكتة جامدة طحن تهون عليك البلوي، وأهو الشعب بيسلي نفسه بدل ما يحط في قلبه ويطب ساكت.
ويمكن حكاية التنكيت علي المصايب وتحويل أي كارثة أو حادثة تحصل لمادة ضحك صفة من أهم صفات مواجهة المصريين للكوارث، ويمكن دي الحاجة الوحيدة اللي بتضمن استمرار الشعب المصري علي قيد الحياة فترة أطول.
وهي خيبة الحكومة جات مصلحة علي الأقل الشعب يضحك، وزمان قالوا لنا: 'اضحك قبل الضحك ما يغلي ويتعبي في قزايز' والكل ماشي علي النصيحة بالحرف، حتي مع حدث تاريخي زي الحريق الهائل اللي اندلع في مجلس الشوري الثلاثاء الماضي.
يوم الحريق كان اللي طالع علي الناس عفريت اسمه نكت، وتسأل أي حد ماشي في الشارع بتضحك ليه؟! يقول علي خيبة الحكومة! أصلها طلعت بالويبة وماكناش عارفين! - علشان طبعا مواطن خايب - الخيبة دي اتأكدت فعلا لما استمر اندلاع الحريق لأكثر من ٦ساعات متواصلة. من أشهر النكت اللي طلعت عشية الحريق نكتة بتقول: 'من الخسائر الفادحة اللي خلفها الحريق كونه ماولعش في السادة الأعضاء بالمرة' أو حتي هي نفس النكتة بشكل تاني: 'لو كان الأعضاء جوا أثناء اشتعال الحريق كانت الخسائر هاتكون أهون ومحتملة وأقل وطأة علي الشعب'.
من النكت اللي بتحمل كما مستفحلا من الحقد الطبقي نكتة بتقول: 'الحريقة دي عملها واحد من الحيتان لما عرف إن مبني مجلس الشوري ٠٨٪ منه خشب، قال لما نحرقه علشان بعد كده طبعا يضطروا يشتروا حديد' والله فكرة، نكتة جامدة طحن المرة دي، مش علشان بتضحك، لأ، دي ممكن تكون أسخف ما تكون لكن ذكية حبتين بتتريق علي فشل رجل الإطفاء في إخماد الحريق 'بيقولك كانوا بيطفوا الحريق بأنابيب أكسجين، جابوها من مخازن وزارة الصحة'، من النكت كمان نكتة منفسنة بتوريك قد إيه الناس قلقانة.. من تداعيات الحريق، بتقول: إنهم علشان يطفوا الحريقة خلٌصوا مية النيل وإحنا داخلين علي رمضان هايبقي صوم وعطش!! علشان تبقي كًملت من كله.. كمان بتورينا قد إيه المسئولين في الحكومة مهمومين بالحريقة وهمهم علي الشعب قوي، حد من المسئولين 'أكيد كلنا عارفينه' بينقل الخبر لواحد تاني من المسئولين برضه 'وكلنا عارفينه برضه' بيقولوا: إن مجلس الشوري ولع، فرد عليه وقال: عقبال الشعب!!
ومن النكت اللي كان فيها سنة قلق من أسلوب إدارة الأزمة وفشل عمليات الإطفاء في إخماد الحريق رغم غرق شارع قصر العيني من كمية المياه التي استخدمت للإطفاء بتقول لك النكتة: إن البعدا كانوا عايزين الميه تخرم الأرض وتغرق المترو والكهربا تفصل عن المترو فيعطل وقال إيه لما يعطل الناس تطلع فوق وتركب العربيات والميكروباصات وياخدوا مخالفات ويدفعوا غرامات وهو ده الهدف ينفضوا جيوب المصريين شفت دماغ المصريين وصلت لإيه!
من التكهنات اللي كانت شاغلة الناس وبيلتوا ويعجنوا فيها إن الكل علي إجماع واحد بإن الحريق بفعل فاعل وإنه لا فيه ماس كهربائي ولا يحزنون لكن الاختلافات كانت حوالين السبب والهدف الخفي وراء الحريق فكان أشهر الكلام ترددا بين الناس فكرة إنهم - البعدا يعني - حرقوا المجلس علشان يلاقوا حجة ينقلوه ل ٦ أكتوبر أو أي حتة تانية ويبيعوا الأرض والمبني القديم اللي عليها لأي مستثمر وفي الغالب وزي ما بتقول التكهنات: إن المستثمر ده أمريكي والسفارة الأمريكية كانت بتراقب بكاميرات مراقبة خاصة كل المباني والشوارع القريبة من السفارة وأكيد نقلت لهم الكاميرات الشرارة الأولي للحريق، ورغم كده ماهرعوش لإطفائها أو الإبلاغ عنها حتي.
ومن النكت كمان اللي بتحمل تهمة مباشرة للمسئولين في المجلس بإنهم كانوا علي علم بالحريق وبصمين عليه بالعشرة نكتة بتقول: 'إن سرور في جلسة خاصة قال للأعضاء موافقة، ردوا عليه: موافقة فأعلنها صراحة موافقة'.
ومن الحاجات الطريفة - ودي بقي آخر حاجة وهانشطب - بيقولك: إن قانون المرور لا نظم المرور ولا حاجة بدليل إن أول خرطوم إطفاء وصل لموقع الحريق كان بعد ٥٤ دقيقة وكمان ماكانش بيجيب مية حيث إنها كانت قاطعة علي الحتة كلها وال ٥٤ دقيقة دول وصلوا ساعة ونص كانت الدنيا ولعت!
وحاجة كمان - المرة دي آخر حاجة فعلا - بيقولك: 'الخراطيم ماكانتش بترش مية علي الحريقة دي كانت بتنقط فركبوا لها جلدة!'.
| |
|
