[color=red]مشوار منير فى صوت الأمة [/color]

الخبر ده اتنشر فى صوت الأمة بعد الموقع ما اتقفل
بس فيه لبس فى حصل فى الموضوع ده وأنا حأحكيلكوا عن اللى حصل بالظبط

التوبيك بتاع مكالمات الرئيس ده فعلا كان موجود فى منتدى مشوار منير
فى قسم الفرى توك قبل الموقع ما يتقفل
والصحفية اللى كتبت الخبر ده كانت مشاركة عندنا فى مشوار
وكانت متابعة الموقع والمنتدى
ولما الموقع حصل فيه العطل اللى حصل الصحفية ربطت بحس صحفى كده
بين الموضوعين وتوقعت ان يكون إغلاق الموقع بناءاً على تعليمات أمنية
بعد توبيك "تليفون الريس" اللى كان موجود خاصة ان صاحب التوبيك سأل الناس
وقالهم تخيلوا لو التليفزيون أعلن عن تليفون الريس كل واحد حيكلمه يقوله ايه
وطبعا الناس اتفتحت وكل واحد اتكلم عن همومه
علشان كده توقعت الصحفية ان التوبيك ده تسبب فى اغلاق الموقع ...
لكن طبعا الخبر مش صحيح لم يتم غلق الموقع بسبب التوبيك ده
لكن احنا كنا بننقل الموقع من سيرفر لسيرفر جديد بعد مشكلة اصابت الموقع ..
ولما المقالة دى نزلت وشافها مدير اعمال منير الاستاذ محمود ابو اليزيد
راح مكلم الصحفية اللى هى "ياسمين" وفهمها الوضع
وعطاها تليفونى وفعلا الصحفية اتصلت بيا و شرحتلها القصة كاملة
و قالتلى ان هى ربطت الحدثين ببعض بحس صحفى ولم تقصد ابدا
اى شوشرة للموقع بالعكس قالتلى انا بحب الموقع وعملتلكوا دعاية كمان
وفى الحقيقة ياسمين شخصية محترمة جداً ولم تقصد أى فبركة
لكنها كانت زعلانة ان الموقع اتقفل وكانت متخيلة ان التوبيك ده هو سبب القفل

وعلى كل حال الحمد لله ان موقع مشوار منير عاد تانى للعمل
وبصراحة انا ماكنتش عارفة ان الموقع مهم قوى عند الناس بالشكل ده
وده حاجة بتسعدنى جداً
خاصة ان الخبر ده لما نزل فى صوت الأمة فوجئت ببرنامج القاهرة اليوم
فى فقرة الصحافة بيناقش الخبر ده وبيتكلم عن الموقع انه اتقفل
ورغم انى كنت زعلانة ان الموقع مقفول لكنى فرحت جداً برد الفعل ده
حتى القاهرة اليوم يعنى ده احنا مهمين قوى واحنا مش واخدين بالنا يا منايرة
لكن طبعا الأهمية دى نابعة من أهمية الفنان اللى احنا متجمعين علشانه
فى الوسط الإعلامى ككل .. الملك محمد منير
__________________

عشقك ندى فاق المدى يا فجر عمرى اللى ابتدا .. يا منير